Барилга Архитектурын Сургуулийн багш, ажилтан нар Өвөрмонголын Технологийн Их Сургуультай танилцаж, туршлага солилцоод ирлээ.

БАС-ийн профессор багш, ажилтан нар 2018 оны 05 дугаар сарын 07-11-ний өдрүүдэд Өвөр Монголын Технологийн Их сургууль болон Барилгын коллежид зочилж батлагдсан удирдамж, хөтөлбөрийн дагуу амжилттай ажиллаад ирлээ. Энэ хугацаанд Технологийн Их сургууль болон Барилгын коллежийн мэргэжлийн багш нартай уулзалт ярилцлага хийж сургуулийн орчин, сургалтын лабораториудтай танилцахын зэрэгцээ Өвөр Монголын барилгын салбарын томоохон бүтээн байгуулалтуудын нэг болох Хөх хотын 70 жилийн ойд зориулан босгосон “Бүх ард түмний үндэстний соёл спортын цогцолбор”-той танилцлаа.

БАС-ийн баг нь Барилгын инженерийн салбарын дэд профессор С.Нямдорж (багийн ахлагч), Хүрээлэн буй орчны инженерийн салбарын ахлах багш Д.Эрдэнэцэцэг, ахлах багш Ц.Цацрал, ахлах багш Ж.Даваацэрэн, ахлах багш С.Хаснавч, багш С.Эрхэмбаяр, Архитектурын салбарын ахлах багш Ч.Оюунжаргал, багш ЭШИХА О.Мөнхчимэг, сургалтын албаны ажилтан Б.Бүжмаа нарын 9 хүний бүрэлдэхүүнтэй байсан ба хөрсний механик, халаалт, агаар сэлгэлт, ус хангамж, ус цэвэрлэгээ, зам гүүр, инженерийн зураг зүйн мэргэжлийн багш нараас бүрдсэн болно.

Зураг 1. ӨМТИС-ийн гадаад харилцааны сургуулийн захирал, багш нарын хамт

Зураг 2. Барилгын сургуулийн захирал сургуулиа, багш, оюутны шидэг бүтээлийг танилцуулж байгаа нь.

Зураг 3. Замын болон УХУЦ-ний лаборатори. Цэвэрлэх байгууламжийн стенд дээр хотын бохир усыг хүлээн авах цэвэрлэх бүх туршилтуудыг хийх боломжтой.

Энэхүү туршлага солилцох, мэргэжил дээшлүүлэх ажлын үр дүнд:

• Дэд профессор С. Нямдоржийн бүтээл монгол-англи- орос-хятад хэлний “Барилгын нэр томъёоны тайлбар толь”-нд уйгаржин монгол тайлбар нэмж Өвөр Монголд хэвлүүлэх боломжийг цаашид судлах;
• БАС-ийн оюутнуудыг Өвөр Монголын Технологийн Их сургуульд дадлага хийлгэх бүрэн боломжтой,  дадлагын хугацаанд оюутны байраар хангах, дадлага хийх объектүүдийг бэлтгэж хүлээн авах бүрэн боломжтой;
• БНХАУ-ын болон ЗГ-аас зарласан ШУТ-ийн төсөлд хамтарсан баг болон оролцох бүрэн боломжтой;
• Барилгын Технологийн коллеж нь багш солилцох, мэргэжлийн багш нарыг урьж ажиллуулах сонирхолтой байдаг талаар;
• Ижил мэргэжлийн багш нартай танилцаж цаашид байнгын холбоотой байж хамтарч судалгаа шинжилгээний ажил хийх , судалгааны үр дүнгээ хуваалцаж бай талаар ярилцаж харилцааны эхний алхамаа хийлээ.

Бидний зочилсон  Өвөр Монголын Технологийн Их сургууль,  Барилгын технологийн  коллеж нь дэлхийд болон БНХАУ-д чансаагаар төдийлөн өндөрт ордоггүй ч сургууль, сургалтын орчин манай сургуультай харьцуулахад харьцангуй сайн байлаа. Хичээл бүрд зориулагдсан лабораторитай, сургуулийн дотор засал энгийн боловч шаардлагатай өрөө тасалгаа, зай талбай хангалттай. Оюутны болон багш нарын шилдэг бүтээл, төслийг олны хүртээл болгож урамшуулах, багшийн мэргэжлийн ур чадварыг дээшлүүлж буй байдал, хичээл сургалтанд онолын тооцоог практик дадлагаар хэрхэн баяжуулж хичээлийг сонирхолтой, үр дүнтэй явуулж байгаа туршлагатай танилцсан нь бидний хувьд маш чухал ололт байлаа.

Мэргэжил мэдлэгээ дээшлүүлж, бусдаас суралцах боломж олгосон ШУТИС-ийн болон БАС-ийн захиргаа, хамт олондоо бидний зүгээс маш их баярласнаа илэрхийлье.