ШУТИС-ийн Барилга, Архитектурын сургуулийн жил бүр уламжлал болгон зохион байгуулагддаг магистр, доктор оюутны Эрдэм шинжилгээний хурал 2025 оны 03 дугаар сарын 28-ны өдөр амжилттай зохион байгуулагдлаа. Уг хурал нь оюутан судлаачдын эрдэм шинжилгээ, судалгааны ажлыг дэмжин урамшуулах, судалгааны ажлын үр дүнг хэлэлцүүлэх, зөвлөгөө авах, эрдэм шинжилгээ, судалгааны ажлыг олон нийтэд танилцуулах, харилцан туршлага хуваалцах, хамтран ажиллах бололцоог бүрдүүлэхэд оршдог.

Энэ удаагийн хурлыг М.Уянга захиралтай “Эн Эй Пи Групп” ХХК  ерөнхий ивээн тэтгэгчээр ажиллаа.    

Үнэлгээний комисст БАС-ийн ЭНБ дарга доктор Г.Адъяажав, Архитектурын салбарын эрхлэгч доктор Г.Цовоодаваа, инженерийн байгууламжийн салбарын эрхлэгчийн үүрэг гүйцэтгэгч доктор Н.Болдбаатар, барилгын инженерийн салбарын ахлах багш доктор Д.Гомбосүрэн, Хүрээлэн буй орчны инженерийн салбарын ахлах багш доктор И.Анастасия Викторовна нар ажиллаж, судлагдсан байдлын дүгнэлт эшлэл, шинжлэх ухааны агуулга түвшин, үр дүн,  шинэлэг тал онол практик ач холбогдол, илтгэлийн чанар өгүүлэл стандарт баримталсан эсэх, асуулт хариулт гэсэн шалгуур үзүүлэлтэнд үндэслэн  дүгнэлээ.

Комиссын гишүүд

Эрдэмтэн нарийн бичгийн дарга доктор Г.Адъяажав хурлыг нээн үг хэлэв.

Эрдэмтэн нарийн бичгийн дарга Г.Адъяажав

Ерөнхий ивээн тэтгэгч “Эн Эй Пи Групп” ХХК-ийн стратеги хариуцсан менежер Б.Марал  компаний танилцуулга хийв.

“Эн Эй Пи Групп” ХХК-ийн стратеги хариуцсан менежер Б.Марал

Магистр оюутны хурлын  Тэргүүн байрыг барилгын инженерийн салбарын доктор, профессор М.Сугар удирдагчтай барилгын инженерийн салбарын магистрант Б.Мөнхцацрал “Үйлдвэрийн барилгын төмөрбетон юүлүүрийг карбон файбер материалаар хүчитгэх судалгаа” сэдэвт илтгэлээр;  

Дэд байрыг хот байгуулалтын салбарын ахлах багш, доктор (PhD) Б.Ариунжаргалан    удирдагчтай хот байгуулалтын салбарын магистрант Д.Халиун “Улаанбаатар хотын бичил хорооллын биет орчны онцлогийг тодорхойлох судалгаа” сэдэвт илтгэлээр;  

Гутгаар байрыг хот байгуулалтын салбарын ахлах багш доктор Б.Ариунжаргалан удирдагчтай хот байгуулалтын салбарын магистрант Г.Нямдэлгэр “Орон сууцны бодлогын хүрээн дэхь орон зайн орчны онцлогийг тодруулах судлагаа” сэдэвт илтгэлээр;  

Тусгай байранд барилгын инженерийн салбар доктор, дэд профессор П.Сэргэлэн удирдагчтай барилгын инженерийн салбар магистрант Ж.Армангүл “Бохир ус зайлуулах байгууламжид хэрэглэх бетоны судалгаа” сэдэвт илтгэлээр тус тус эзлэв.

Тэргүүн байр магистрант Б.Мөнхцацрал	Дэд байр магистрант Д.Халиун
Гутгаар байр магистрант Г.Нямдэлгэр	Тусгай байр магистрант Ж.Армангүл

Тэргүүн байр эзэлсэн магистрант Б.Мөнхцацралд өргөмжлөл, “Эн Эй Пи Групп” ХХК-ийн мөнгөн шагнал 800 000 төгрөг, кредитийн урамшуулал, дэд байр эзэлсэн магистрант Д.Халиунд  өргөмжлөл,  “Эн Эй Пи Групп” ХХК-ийн мөнгөн шагнал 600 000 төгрөг, кредитийн урамшуулал, гутгаар байр эзэлсэн магистрант Г.Нямдэлгэрт өргөмжлөл, “Эн Эй Пи Групп” ХХК-ийн мөнгөн шагнал 400 000 төгрөг, кредитийн урамшуулал, тусгай байранд магистрант Ж.Армангүлд өргөмжлөл, “Эн Эй Пи Групп” ХХК-ийн мөнгөн шагнал 100 000 төгрөгийг тус тус гардуулав.

Доктор оюутны хурлын Тэргүүн байрыг барилгын инженерийн салбарын доктор, дэд профессор Р.Хишигээ удирдагчтай барилгын инженерийн салбарын докторант П.Содномцэрэн “Хүйтэн нөхцөлд бетоныг цахилгаанаар халааж бэхжүүлсэн бетоны физик, механик шинж чанарын судалгаа” сэдэвт илтгэлээр;

Дэд байрыг барилгын инженерийн салбарын ахлах багш, доктор Д.Гомбосүрэн удирдагчтай барилгын инженерийн салбарын докторант Б.Золжаргал “Төмөрбетон каркасан барилгын даацын элементүүдийн бат бэхийн шатлал тогтоох судалгаа” сэдэвт илтгэлээр;

Гутгаар байрыг хот байгуулалтын салбарын эрхлэгч доктор Э.Пүрэв-Эрдэнэ удирдагчтай хот байгуулалтын салбарын докторант С.Минжин “Хотожсон орчны төлөвлөлт хэрэглэгчийн зан төлөвт  нөлөөлөх хүчин зүйлсийг тодорхойлох нь: (Улаанбаатар хотын гэр хорооллын жишээ)” сэдэвт илтгэлээр;

Тусгай байрыг архитектурын салбарын зөвлөх профессор, доктор И.Гончигбат удирдагчтай ахлах багш, докторант Н.Нарантуяа “Хот төлөвлөлтийн хэв маягт шинэчлэлтийн (инноваци) нөлөөлөл судалгаа” сэдэвт илтгэлээр тус тус эзлэв.    

Тэргүүн байр докторант П.Содномцэрэн	Дэд байр докторант Б.Золжаргал
Гутгаар байр докторант С.Минжин	Тусгай байр докторант ахлах багш Н.Нарантуяа

Тэргүүн байр эзэлсэн докторант П.Содномцэрэнд өргөмжлөл, “Эн Эй Пи Групп” ХХК-ийн 800 000 төгрөг, кредитийн урамшууллыг, дэд байр эзэлсэн докторант Б.Золжаргал өргөмжлөл,“Эн Эй Пи Групп” ХХК-ийн 600 000 төгрөг, кредитийн урамшууллыг, гутгаар байр эзэлсэн докторант С.Минжинд өргөмжлөл, “Эн Эй Пи Групп” ХХК-ийн мөнгөн тэтгэлэг 400 000 төгрөг, кредитийн урамшууллыг, тусгай байранд ахлах багш докторант Н.Нарантуяад өргөмжлөл “Эн Эй Пи Групп” ХХК-ийн 100 000 төгрөгийг гардуулав.

Салбарын шинжлэх ухааны хөгжилд үнэтэй хувь нэмэр оруулан ивээн тэтгэж, оролцсон “Эн Эй Пи Групп” ХХК-ийн хамт олонд талархалаа илэрхийлэн, ажил үйлс нь өрнүүн дэлгэр байхыг хүсэн ерөөе.

Нийт шалгарсан судлаачдиддаа баяр хүргэж, цаашдын судалгаа шинжилгээний ажилд нь өндөр амжилт хүсэн ерөөе.

Мэдээ бэлтгэсэн БАС-ЭША