2026 оны 6 сарын 10 - ны өдөр /ШУТИС 8-р байр, 12 давхарт, олон улсын хурлын танхимд/ БАС-ийн Инженерийн байгууламжийн тэнхимийн Авто зам, Гүүр, Усны барилга байгууламж мэргэжлээр төгсөгч оюутнуудыг мэргэжлийн чиглэлээр ажил олгогчидтой танилцуулах, ажлын байранд зуучлах, дадлага хийх оюутнуудыг дадлага хийж ажиллах боломжоор хангах байгууллагуудтай танилцуулах “Ажил олгогч төгсөгчдийн өдөрлөг” амжилттай зохион байгуулагдлаа.

Монголын Авто Замчдын Холбоо, Монголын Авто Замчин Залуучуудын Холбоо, Монголын Усны Инженерчлэлийн Мэргэжлийн Холбоо болон авто зам, гүүр, усны барилга байгууламж чиглэлээр үйл ажиллагаа эрхэлдэг 10 гаруй байгууллага, оролцлоо.

Өдөрлөгийн хүрээнд ИБТ – ийн мэргэжил тус бүрээр шилдэг дипломын төсөл шалгаруулав. Үүнд:

• Авто замын инженерчлэл хөтөлбөр: Т.Гүндэгмаа ” Дундговь аймаг, Адаацаг сум, Сүм Хөх бүрдээс Бага газрын чулуу чиглэлийн аялал жуулчлалын зориулалттай авто замын төсөл” шалгарч, “Макс рөүд” ХХК ивээн тэтгэн мөнгөн шагналаар урамшуулав.
• Гүүрийн инженерчлэл хөтөлбөр: Н.Доржсүрэн “Баянхонгор аймаг, Баянхонгор сумын Түйн гол дээрх төмөрбетон гүүрийн төсөл” шалгарч, Монголын Авто замчдын холбоо ивээн тэтгэн мөнгөн шагналаар урамшуулав.
• Усны барилга байгууламж хөтөлбөр: Э.Сод-Эрдэнэ “Өвөрхангай аймаг, Зүүнбаян-Улаан сум, Цагаан бургасын усан УЦС-ын барилга байгууламжийн төсөл” шалгарч, Монголын Усны инженерчлэлийн мэргэжлийн холбоо ивээн тэтгэн мөнгөн шагналаар урамшуулав.

Өдөрлөгийн үеэр 2025-2026 оны хичээлийн жилд дээрх хөтөлбөрүүдээр амжилттай суралцаж, хамт олноо манлайлсан оюутнуудад урамшуулал, мөнгөн шагнал олгов.

“Авто замын инженерчлэл” хөтөлбөрийн шилдэг дипломын төслийг ивээн тэтгэж оролцсон “Макс рөүд” ХХК, “Гүүрийн инженерчлэл” хөтөлбөрийн шилдэг дипломын төсөл ба амжилттай суралцаж буй 1-4 дүгээр курсын 7 оюутны суралцах үйл ажиллагааг дэмжиж ивээн тэтгэсэн “Монголын авто замчдын холбоо”-нд ИБТ-ийн авто зам гүүрийн мэргэжлийн багш нараас гүнээ талархаж буйгаа илэрхийлье.

Авто зам, гүүрийн чиглэлээр 2025 онд элсэн суралцаж буй оюутнуудын дунд “Мэргэжлийн удиртгал” хичээлийн хүрээнд зохион байгуулсан уралдаант тэмцээнд тэргүүн байр эзэлсэн багийг урамшуулан дэмжиж ажилласан “Монголын авто замчин залуучуудын холбоо”-нд ИБТ-ийн авто зам гүүрийн мэргэжлийн багш нараас гүнээ талархаж буйгаа илэрхийлье.

“Усны барилга байгууламж” хөтөлбөрөөр амжилттай суралцаж буй 1,2-р курсын 2 оюутны суралцах үйл ажиллагааг дэмжиж ивээн тэтгэсэн “Хидро инженеринг” ХХК-ийн хамт олонд талархал илэрхийлье.

ШУТИС, БАС, Инженерийн байгууламжийн тэнхимээс уламжлал болгон жил бүр зохион байгуулагддаг энэхүү өдөрлөгийг төдийгүй салбарын мэргэжилтэн бэлтгэх үйл ажиллагааг дэмжин ивээн тэтгэж ажилласан “Монголын Авто Замчдын Холбоо”, “Монголын Авто Замчин Залуучуудын Холбоо”, “Монголын Усны Инженерчлэлийн Мэргэжлийн Холбоо”, “Макс рөүд” ХХК, “Хидро инженеринг” ХХК-д дахин талархал илэрхийлж, ажлын өндөр амжилт хүсье.

Тэнхимийн багш ажилчдын зүгээс нийт төгсөгчдөдөө халуун баярыг хүргэж ажлын өндөр амжилт хүсье.

БАС-ийн ИБТ-ийн хамт олон 2026.06.10